1.ஆட்சியிற் பேராற்றல் யாவுள மற்றெந்த
சூழ்ச்சியினும் முந்துறும்ஊ ழல்
- இதன் கருத்தாவது ஆட்சியின் ஆற்றல் ஊழலே என்பது.
2.பெற்றதனால் ஆயபய னென்கொல் பதவி
உற்றபின்செய் யாக்கால்ஊ ழல்
-(இ - து) பதவியால் ஆய பயன் ஊழலே என்பது.
3.அவரவர் ஆனவரை செய்யலாம் ஆமாம்
இவரும்செய் தாலென்ஊ ழல்
- (இ - து) ஊழலின் நடப்பியல் அறம் இன்னதென்பது.
4. வழக்கெனினென் வாட்டும் சிறையெனினென் ஆள்வார்க்(கு)
அடிபணிந்தே செய்திடின்ஊ ழல்
- (இ-து) இடையூறு நிகழினும் பொருட்டன்று என்பது.
5.திட்டம் நிதியொதுக்கீ டொப்பந் தமிம்மூன்றால்
வெட்டுக வெல்லும்ஊ ழல்
6.பெரிதின் பெரிதாய்க் கடன்பெற்றோர் ஓட
உரியன செய்தலும்ஊ ழல்
7. நடுவ ணரசின்தாள் சேர்ந்தவர் தம்வழக்கைத்
தடுத்துத்தப் பச்செயும் ஊ ழல்
8.வேண்டியோர்க்(கு) ஆக்கம் விளைய விதிவளைத்துத்
தாம்தூயர் ஆதலும்ஊ ழல்
- இவை நான்கும் ஊழற்கு வரைவிலக்கணம்.
9.ஊழலை ஊழலால் வெல்வர் வாழ்முறையாக்
கொள்வா ரதுவும்ஊ ழல்
- (இ-து) ஊழலை வெல்லும் வழி ஊழலே என்பது.
10.சட்டம் ஒறுப்பினும் நீங்கினுயிர் ஈகநினை
கட்டிடமும் நல்கும்ஊ ழல்
- (இ-து)ஊழல் ஈகப்புகழ் நினைவகம் தரும் என்பது.
[பாவிலன்றி ஊழல் பழகிலேன் நாவிலிவை
வந்தவா றேநவின்றேன் நான்]
No comments:
Post a Comment